Pnawn dydd Mawrth roedd y Drwm yn byrlymu gyda sŵn plant o bob oed yn mwynhau awr o gartwnau o’r archif.

Ymhlith yr hen ffefrynnau o’r 1980au a 90au – oes aur i animeddio yng Nghymru – oedd Superted, Sam Tân a Wil Cwac Cwac.

Yn y rhaglen hefyd roedd un animeiddiad hen iawn – o’r 1920au – sef Jerry the Tyke, a gan ei fod yn dyddio o oes cyn dyfeisio’r trac sain, daeth Stephen Briggs i mewn i gyfeilio ar y piano.

Heddiw mae mwy o gartwnau Cymraeg ar gael nag erioed o’r blaen, llawer iawn ohonynt i’w gweld bob dydd ar wasaneth ‘Cyw’ S4C. Eto i gyd, rwy’n gobeithio bydd plant yn dal i fynd i’r sinema i fwynhau gweld cartwnau gyda’i gilydd ar y sgrin fawr, fel y gwnaethon nhw yma bnawn dydd Mawrth diwetha’.

Un o’r datblygiadau diddorol diweddar yn AGSSC yw’r system recordio teledu a radio oddi ar yr awyr. Fel Archif Benodedig, mae gan y Llyfrgell gasgiad helaeth iawn o recordiadau o’r fath, ac ers cwpwl o flynyddoedd mae’r dull recordio wedi newid i system ddigidol.

Mae’r Llyfrgell nawr yn chwilio am ddatblygydd meddalwedd i gwblhau’r dasg o integreiddio’r system recordio gyda’i phrif systemau rheoli gwybodaeth, ac i ddatblygu dull mynediad amgen i’w defnyddwyr.

Mae manylion y swydd (dyddiad cau 2 Awst) ar gael ar wefan y Llyfrgell Genedlaethol.

Yn y misoedd diwethaf dwi wedi cael fy nghyfweld a chynnwys ar gyfer sawl rhaglen radio a theledu, yn trafod fy swydd yn yr Archif. Y gobaith yw bod y cyfweliadau yn creu cyhoeddusrwydd i’r Archif o fewn Cymru ac yn rhoi hyder i mi siarad yn gyhoeddus.

Yr wythnos nesaf byddaf yn cael fy nghyfweld eto, y tro hwn gan arwr, ffrind, gyd-casglwr a fryfrydwr am y Sin Roc Gymraeg; Rhys Mwyn. Bydd Rhys a’i gynhyrchydd yn ymweld a’r Archif prynhawn Llun nesaf, i siarad am yr Archif a’r polisi casglu, fel rhan o daith Rhys o amgylch Cymru yn edrych ar sut mae gwahanol ardaloedd wedi cyfranu at y sin gerddoriaeth yn y gorffennol ac y presennol.

Yn nhŷ tafarn Yr Angel, yn Aberystwyth ym mis Mawrth 1990, wnes i gyfarfod Rhys am y tro cyntaf. Ar y pryd yr oedd yn chwarae yn ei grŵp Yr Anrhefn. Yr oeddent ar fin rhyddhau ei sengl Rhedeg i Paris. Ers hynny, pan fyddwn yn cwrdd, byddwn yn sgwrsio am gerddoriaeth, diwylliant tan-ddaearol Cymru a bywyd yn gyffredinol.

Edrychaf ymlaen i groesawu Rhys i’r Archif, oherwydd y mae wedi rhoi sawl, sawl eitem i ni dros y blynyddoedd ac yn bwynt cyswllt gwerthfawr iawn am wybodaeth a chysylltiadau eraill.

Bydd y rhaglen yn debygol o gael ei ddarlledu ar Radio Cymru nos Fercher yr 7fed o Orffennaf.