P’nawn heddiw, cwrddais â Alison Smith a Dafydd Pritchard o’r Archif. Rydym yn rhoi cyfres o glipiau sain at eu gilydd ar gyfer y digwyddiad Seiniau o’r Archif a fydd yn cael ei gynnal yn y Drwm ym mis Mai. Bydd y digwyddiad yn rhoi blas o’r casgliad sain.

Dwi’n edrych ymlaen i roi’r clipiau yma at eu gilydd, gan bydd cyfle i ni fynd i’r gell i bori trwy hen recordiau a gweld rhai o’r cloriau gwych sydd yno! Byddwn yn arddangos rhai o’r goreuon ar y diwrnod ar y sgrin fawr yn y Drwm yn ystod y digwyddiad. Dyma un o fy ffefrynau personol, sef clawr y trydydd E.P a ryddhawyd gan Tepot Piws dan label Sain yn 1971.

Neithiwr, daeth criw o Ferched y Wawr Rhydypennau yma i’r Drwm am noson o ffilmiau. Dangoswyd tair ffilm wahanol iawn iddynt gan gynnwys ffilm cyflwyno Llyfrgell Genedlaethol Cymru a Spotlight on Wales. Ffilm ddogfen ydy Spotlight on Wales, sy’n edrych ar holl fwrlwm Eisteddfod Genedlaethol Cymru yn Nolgellau yn 1949. Dyma un o fy hoff ffilmiau yn y casgliad, gan ei fod wedi’i leoli yn fy ardal enedigol, sef Dinas Mawddwy a Dolgellau.

Bu i bawb fwynhau yn arw

Heddiw, yn y Drwm,  dangosom dair ffilm teithio (‘Conway Castle 1898′, ‘Cambrian Coast 1940′ a ‘Land of the Red Dragon 1968′) i aelodau cymdeithas athrawon wedi ymddeol, ADWY, cyn eu tywys o gwmpas arddangosfa ‘Byd Bach’ yn Oriel Gregynog. Tynnwyd eu sylw gan y car rasio – mae modd eistedd ynddo i weld y ffilm, ‘I’ve only got 4 minutes’, sy’n dangos taith ar ras wyllt o Bontypridd i Gaerdydd y 1960au.