Wythnos diwetha cawsom ymweliad gan y ‘Friends of Llangollen Motor Museum’. Fel fydde rhywun yn ei ddisgwyl, fe gyrhaeddon nhw mewn tipyn o steil, ac o bob cwr o Gymru. Clasuron ym myd y ceir oedd eu dileit, ac fe gawson nhw weld un o glasuron yr Archif ar y sgrin fawr yn y Drwm, sef y ffilmo 1950, ‘The Fruitful Year’, cyn cael taith o gwmpas y Llyfrgell. Anelu am adre wedyn, er gwaetha’r gawod o law trwm – a nifer yn eu ceir agored!
A hithau’r fis Awst, mae’r flwyddyn yn fflio heibio! Mae Awst wastad yn fis rhyfedd yma. Er bod llawer o’r staff i ffwrdd ar wyliau, mae’r ymholiadau dal yn llifo fel o pob pen o Brydain.
Yr wythnos yma, dwi wedi bod yn dewis clipiau ffilm i’w dangos yn yr Arddangosfa Hamdden a fydd yn agor yn y Llyfrgell Genedlaethol ar 1 Hydref, nes ymlaen yn y flwyddyn. Bydd pump sgrin wahanol yn yr arddangosfa, a pob un yn dangos gwahanol agweddau o hamddena yng Nghymru dros y blynyddoedd.
Hefyd yr wythnos yma, dwi wedi bod yn cadarnhau trefniadau ar gyfer digwyddiadau fydd yn cael eu cynnal yn y Drenewydd, fel rhan o broject Estyn Allan y Llyfrgell. Byddwn yn cymryd rhan yn y project yma trwy ddangos ffilm, The Last Days of Dolwyn, yn Sinema’r Regent, Drenewydd ar 20 Hydref. Mae digwyddiadau eraill ar y gweill, a byddwn hefyd yn gweithio gyda Oriel Davies am y tro cynta. Mwy o fanylion am hyn i ddilyn..
Dwi ffwrdd ar wyliau yr wythnos nesa’, felly’n treulio’r wythnos yma yn clirio fy nesg a gorffen tasgau.
Dyma mwy o luniau o’r tê parti a gynhaliwyd yn yr Eisteddfod. Diolch i Keith Morris am rai ohonynt. (Mwy o wybodaeth am y tê parti ym mhostiad Iwan, isod.)
Yr Eisteddfod yn Wrecsam oedd ein cyrchfan ddoe, a digwyddiad ar stondin y Llyfrgell am 3 o’r gloch y pnawn i ddathlu pen-blwydd yr Archif yn 10 oed.
Cyfle i ddefnyddwyr a chefnogwyr (fel Carys, Gwawr a Lowri yn y llun) i ddod ynghŷd dros baned a chacen a thrafod y prosiectau diweddara sy’ ar y gweill gan bawb – a chael tipyn o hwyl ar yr un pryd!
Cyfle i gyhoeddi hefyd bod S4C ar fin trosglwyddo nifer o ffilmiau a rhaglenni teledu cynnar i’n gofal, fel eu bod, yng ngeiriau Arwel Ellis Owen, ar gael i bawb o bobol Cymru. Darllenwch mwy am y stori yma.
