Nos Lun a nos Fawrth nesaf, (21 a 22ain o Dachwedd) mi fydd yr Archif Sgrin a Sain Genedlaethol yn Neuadd Dwyfor, Pwllheli, yn helpu Neuadd Dwyfor i ddathlu 100 mlynedd o ddangos ffilmiau ar y safle. Bydd y rhaglen yn wahanol ar y 2 noson – gan ddangos clasuron Cymreig fel Y Chwarelwr (wedi ei hadfer) a’r Etifeddiaeth, uchafbwyntiau o’r ffilm fawr ‘goll’ The Life Story of David Lloyd George (1918) yn dangos y golygfeydd lleol, a hefyd ffilmiau lleol o Bwllheli o 1911 ymlaen – yn cynnwys carnifalau, Eisteddfod, ac awyren gynnar iawn yn mynd … ond ddim ymhell! Bydd y pianydd ffilmiau mud Paul Shallcross yn cyfeilio ar y nos Lun.

Y ddwy sioe yn cychwyn am 7.30. Tocynnau ar gael o Neuadd Dwyfor, Stryd Penlan, Pwllheli – rhif ffon 01758 704088, E-bost – neuadd_dwyfor@gwynedd.gov.uk

Dros yr wythnosau diwethaf, ‘den ni wedi bod yn brysur iawn efo amryw o ddangosiadau, ac wedi denu cynulleidfaoedd niferus yn y broses.

Ar 20 Hydref, dangosom The Last Days of Dolwyn yn Sinema’r Regent, Drenewydd. Dangoswyd hefyd ffilmiau archif o ardal Drenewydd, gan gynnwys ffilm o eira mawr 1947 a carnifal Drenewydd yn 1950. Roedd y dangosiad yma yn ran o broject Estyn Allan Llyfrgell Genedlaethol Cymru, ac yn un o nifer o ddigwyddiadau sydd wedi bod yn digwydd yn Drenewydd dros y misoedd diwethaf.

Daeth cynulleidfa o tua 110 i’r sinema i weld y ffilmiau. Croesawyd nhw gan Dafydd Pritchard, Rheolwr yr Archif. Hoffwn ddiolch yn fawr i staff Sinema’r Regent am eu cymorth wrth drefnu’r dangosiad hwn.

Nos Wener diwethaf, aethom i Gwmlline, i ddangos ffilmiau archif o’r ardal. Mae Cwmlline yn bentref bach tua 8 milltir i’r gogledd o Fachynlleth. Unwaith eto, daeth cynulleidfa niferus i’r neuadd bentref i weld ffilmiau o’r ardal. Amrywiodd y ffilmiau o ffilm o’r Eisteddfod Genedlaethol a gynhalwyd yn Machynlleth yn 1937, i ffilm ar y Sioe Frenhinol yn y dref yn 1954 a clip o Sioe Cemaes yn 1940.

Rhoddwyd sypreis i’r gynulleidfa yn ystod y torriad hefyd, wrth i Heulwen Williams, gwraig leol, dderbyn gwobr Halen y Ddaear Wedi 3, am ei holl waith caled yn y gymuned. Daeth y cyflwynydd, Alwyn Humphreys, i’r neuadd i roi’r gwobr iddi. Bydd hyn yn cael ei ddarlledu ar Wedi 3 yn yr wythnosau nesaf.