Dydd Sadwrn yma (28/01/12) mae drysau y Llyfrgell yn agor ar gyfer diwrnod agored cyntaf 2012! Yn ystod y dydd fydd amryw o ddigwyddiadau, rhai or uchafbwyntiau fydd ffilmiau yn y Drwm, yn cynnwys ffilmiau Pictiwrs y Plant yn y bore a ffilmiau o Aberystwyth yn y 1920au yn y prynhawn. Mi fydd amryw o sgyrsiau difir yn cynnwys Is-Ganghellor Aberystwyth yr Athro Aril McHahon, Will Troughton a sgwrs gyda’r newyddiadiwyr Huw Edwards yn trafod i’w gyfres newydd – ‘The Story of Wales’.

Mi fydd hefyd cyflwyniad i un o gasgliadau sain mwyaf difir yr Archif Sgrin a Sain sef casgliad hanes llafar Llyfrgell Ceredigion. Mae yn gasgliad eang gyda atgofion rhai o gymeriadau fwyaf lliwgar a adnabyddus yr ardal. Ar ol dewis a dethol, daethwyd a rhestr o clipiau sydd yn obeithiol yn dangos amrywiaeth y casgliad. Mae chwech clip sain i gyd yn trafod sawl gwahanol bwnc. Rhai or pynciau y trafodir yw hanes Capel Bangor (gan Mr Tom MacDonald), hanes Penwuch yng nghwmni lliwgar y cymeriad hynnod Dafydd Edwardes. Mi fydd clipiau hefyd gan Evan Jones – yn trafod ei atgofion o ardal Llanfarian, clip yn trafod hanes harbwr Aberystwyth gyda Capten William Ellis, Capten Jack Williams a Mr Howell Ellis, Mrs Katie Morris yn trafod i’w gyrfa fel athrawes a Mrs Lewis, Aberaeron yn trafod Cribyn cyn ac yn ystod y Rhyfel Byd Cyntaf.

Gwledd i’r clustiau y llygaid ac i’r ysfa am wybodaeth! Dewch yn llu!

Wythnos diwetha’ mi es i ac Anwen (ein Swyddog Mynediad) i seminar yn yr Amgueddfa Genedlaethol oedd yn trafod y Fagloriaeth Gymreig a sut gall archifau, amgueddfeydd a llyfrgelloedd gefnogi’r Fagloriaeth drwy ddarparu adnoddau a phrofiadau perthnasol i’r disgyblion ysgol sy’n ei hastudio.

Bellach mae’r rhan fwyaf o ysgolion uwchradd Cymru yn cynnig y Fagloriaeth – ar gyfer y blynyddoedd uwch y unig ar hyn o bryd, ond yn y dyfodol bydd plant 14+ yn ei dilyn hefyd. Gall disgyblion ddewis o ystod eang o bynciau i’w hastudio, ar yr un pryd a’u cyrsiau Lefel A – ac mae’r ddarpariaeth yn syndod o eang – o harddwch i sustemau llywodraeth ar draws y byd! Mae’r pwyntiau a gaiff y disgyblion am gyflawni’r gwahanol adrannau  (drwy waith yn y dosbarth, yn y gymuned, ymchwil unigol ac ati) yn cyfrif tuag at y pwyntiau anghenrheidiol  ar gyfer mynediad i addysg uwch.
Mi wnaethon ni fwynhau sawl cyflwyniad difyr ac annisgwyl gan sefydliadau fel Pwll Mawr, Canolfan y Dechnoleg Amgen ac ie … y Llyfrgell Genedlaethol ei hun gydag Owen Llywelyn, ein Swyddog Addysg Hŷn! – a dechrau hel syniadau ar pa ffilmiau o’r Archif fyddai o ddiddordeb i ysgolion i gefnogi eu sesiynau ‘BAC’, fel y’i gelwir. Y peth mwyaf annisgwyl oedd y ‘demo’ o sut mae Canolfan y Dechnoleg Amgen yn defnyddio lein ddillad a phegiau i gyfleu taith anhygoel, ryngwladol y ‘Kinder Egg’ o’i dechrau i’w diwedd yn nwylo plant eiddgar! Bydd yn gamp dilyn hynna efo ffilm – ond mi driwn ni’n gorau…

Cynhelir Wŷl Slapstig 2012 ym Mryste ar ddiwedd mis ‘ma. Gweler eu gwefan am fwy o fanylion neu YouTube am fideo rhag-flas.

Llun - drwy caredigrwydd Gwyl Slapstig 2012

Yn ddiweddar buom yn brysur yn digido clipiau o ffilmiau am Lloyd George.

Daeth i amlygrwydd tua’r un adeg – dechrau’r ugeinfed ganrif – â thwf y diwydiant ffilmiau. Erbyn iddo ddod yn Brif Weinidog ym 1916, ef oedd y gwladweinydd Prydeinig cyntaf i gael ei gofnodi yn helaeth ar ffilm.

Mae ‘na ffilmiau gwych ohono yn y casgliad, yn ffilmiau dogfen a theuluol, ac wrth gwrs y cofiant epig hwnnw, ‘The Life Story of David Lloyd George’.

Ar hyn o bryd ry’m ni wedi eu gosod yn weddol syml ar ein gwefan er mwyn i bawb gael eu gweld ond mae ‘na gynlluniau ar droed i’w defnyddio yn fwy creadigol yn y dyfodol…

Mae’n werth pori ynddyn nhw, ac os mai dim ond un ffilm fyddwch chi eisiau ei gweld, edrychwch ar ymweliad Lloyd George â Hitler ym 1936.